जिल्हा प्रतिनिधी/सतीश पटले
तुमसर तालुक्यातील सोंड्या धरणात आज दिनांक 14 मे रोज मंगळवार ला सकाळी 8 वा. मासे पकडण्याकरिता गेलेल्या युवकाचा धरणातील पाण्यात पाय घसरून मृत्यू झाल्याची धक्कादायक घटना घडली. सविस्तर वृत्त असे की, राजेंद्र मोरेश्वर अंबाडारे वय 30 वर्षे, रा. वारपिंडकेपार, ता. तुमसर असे मृत युवकाचे नाव असून तो आपल्या मित्रांसोबत सोंड्या येथील बावनथडी नदीवरील धरणात मासे पकडायला गेला असता मासे पकडताना धरणात पाय घसरल्याने राजेंद्र आंबेडारे याचा पाण्यात बुडून मृत्यू झाला. सदर घटनेची माहिती सिहोरा पोलिसांना मिळताच पोलिसांनी घटनास्थळ गाठून मृतदेह उत्तरीय तपासणीसाठी शासकीय उपजिल्हा रुग्णालय तुमसर येथे रवाना केले. दरम्यान फिर्यादी मोरेश्वर रामचंद्र आंबेडारे यांच्या तक्रारीवरून व पोलीस पंचनामा तसेच प्राप्त वैद्यकीय अहवालावरून घटनेचा मर्ग सिहोरा पोलिसात दाखल करण्यात आला असून घटनेचा पुढील तपास ठाणेदार नितीन मदनकर यांच्या मार्गदर्शनात पोलीस हवालदार मनोज ईळपाते करीत आहेत.
