आमगाव, २३ ऑक्टोबर: आमगावच्या मुख्य रस्त्यावर वाढत्या वाहतुकीच्या समस्येमुळे नागरिक त्रस्त आहेत. रस्त्यावर दुकानदारांनी ठेवलेल्या फ्लॅक्स बोर्डांमुळे आणि अस्ताव्यस्तपणे पार्क केलेल्या दुचाकी व चारचाकी वाहनांमुळे निर्माण होणाऱ्या अडथळ्यांची तात्काळ सोडवणूक करण्याची मागणी अखिल भारतीय शाखा आमगावच्या वतीने करण्यात आली आहे. या समस्येमुळे शाळकरी विद्यार्थी, पादचारी आणि ज्येष्ठ नागरिकांच्या सुरक्षिततेवर प्रश्नचिन्ह निर्माण झाले आहे.
मुख्य रस्त्यावर दुचाकी व चारचाकी वाहनांचे अनियमितपणे पार्किंग आणि दुकानदारांच्या फ्लॅक्स बोर्डांमुळे रस्ता अरुंद होऊन वाहतुकीला अडथळा निर्माण होत आहे. नागरिकांनी सांगितले की, रस्त्यावरून वाहन चालवणाऱ्यांचे नियंत्रण सुटल्यामुळे अनेक वेळा अपघात घडले आहेत, ज्यामुळे रस्त्यावरील सुरक्षेचा गंभीर प्रश्न उभा राहिला आहे.
वाहतुकीवरील समस्येवर तोडगा काढण्यासाठी पोलीस प्रशासनाने या रस्त्यावर मोबाईल कॅमेऱ्याची व्हॅन तैनात करून छुप्या कॅमेराद्वारे वेगाने जाणाऱ्या वाहनांवर नजर ठेवावी आणि अशा वाहनचालकांवर दंडात्मक कारवाई करावी, अशी मागणी निवेदनातून करण्यात आली आहे. हे केल्यास बेफिकीरपणे वाहन चालविण्यावर नियंत्रण मिळवता येईल आणि अपघातांचे प्रमाण काही अंशी कमी होऊ शकते, असा विश्वास स्थानिकांचा आहे.
अखिल भारतीय शाखा आमगावचे अध्यक्ष मेश्राम, एल. एम. खंडाईत, कोषाध्यक्ष वी. एम. कटरे, संघटन मंत्री जगदीश शर्मा आणि डॉ. अनिल मुंजे यांनी पोलीस निरीक्षकांना भेट देऊन निवेदन सादर केले. जनहिताच्या दृष्टीने पोलीस प्रशासनाने तातडीने योग्य ती कारवाई करावी, अशी मागणी करण्यात आली आहे.
स्थानिक नागरिकांनी पोलीस प्रशासनाला आवाहन केले आहे की, त्यांनी रस्त्यावरील वाहतुकीची समस्या सोडवण्यासाठी त्वरित उपाययोजना करावी आणि मुख्य रस्ता सुरळीत व सुरक्षित ठेवावा, ज्यामुळे नागरिकांची सुरक्षितता सुनिश्चित होईल.
