सामाजिक एकतेचा संदेश देत प्रेरणादायी कार्यक्रमाचे आयोजन
गोंदिया : जिल्ह्यातील श्री गणेश ग्रामीण विकास शिक्षण संस्था द्वारा संचालित बाहेकरजी व्यसनमुक्ती केंद्र, आमगाव रिसामा येथे दिनांक 15 नोव्हेंबर 2024 रोजी क्रांतिसूर्य बिरसा मुंडा आणि शीख धर्माचे संस्थापक गुरुनानक यांची जयंती मोठ्या उत्साहात साजरी करण्यात आली.
जयंती कार्यक्रमात उपस्थित मान्यवरांनी क्रांतिसूर्य बिरसा मुंडा यांच्या जीवनकार्याचे महत्व विशद केले. आदिवासी समाजाच्या अधिकारांसाठी आणि स्वाभिमानासाठी त्यांनी केलेल्या संघर्षाची माहिती देत, त्यांच्या विचारांवर आधारित समाज सुधारणा आजही काळाच्या गरजेची असल्याचा संदेश देण्यात आला.
त्याचप्रमाणे, गुरुनानक यांच्या अध्यात्मिक आणि सामाजिक कार्याची महती सांगण्यात आली. त्यांनी दिलेले “सर्व मानवजातीचे कल्याण” या विचाराचे महत्व अधोरेखित करून, त्यांचे विचार व अनुकरण आजच्या पिढीने आत्मसात करण्याचे आवाहन करण्यात आले.
या विशेष कार्यक्रमात व्यसनमुक्ती केंद्रातील कर्मचारी, लाभार्थी आणि इतर अनेक मान्यवर सहभागी झाले होते. सहभागी लाभार्थ्यांना समाजाच्या सर्वांगीण प्रगतीसाठी आणि सकारात्मक बदल घडवण्यासाठी प्रेरित करण्यात आले.
कार्यक्रमाचा समारोप सामाजिक एकतेचा संदेश देत झाला, ज्यामुळे उपस्थितांमध्ये नवचैतन्य आणि प्रेरणेचा साक्षात्कार झाला. अशा प्रकारचे उपक्रम समाजात एकात्मता, आदर्श मूल्ये आणि प्रेरणा निर्माण करणारे ठरत असल्याचे आयोजकांनी नमूद केले.
