जलद न्यायासाठी सुवर्णसंधी
सडक अर्जुनीत 14 डिसेंबर रोजी लोकअदालतीचे आयोजन
सडक अर्जुनी : न्यायालयात 14 डिसेंबर 2024 रोजी चौथ्या राष्ट्रीय लोकअदालतीचे आयोजन करण्यात आले आहे. या लोकअदालतीद्वारे प्रलंबित प्रकरणांचा जलद निपटारा आणि नागरिकांमध्ये सलोख्याचे संबंध प्रस्थापित करण्याचा उद्देश आहे. महाराष्ट्र राज्य विधी सेवा प्राधिकरणाच्या मार्गदर्शनाखाली जिल्हा विधी सेवा प्राधिकरण, तालुका विधी सेवा समिती आणि वकील संघाच्या संयुक्त विद्यमाने ही लोकअदालत होणार आहे.
राष्ट्रीय लोकअदालतीत प्रलंबित आणि दाखलपूर्व प्रकरणे सामंजस्याने सोडवली जातात. या लोकअदालतीत दिवाणी स्वरूपाचे दावे, तडजोडपात्र फौजदारी प्रकरणे, कौटुंबिक हिंसाचार प्रतिबंधक कायदा 2005 मधील अर्ज, चेक बाउन्स प्रकरणे, बँक कर्ज वसुली, वीज बिल आणि पाणी कराच्या वादांशी संबंधित प्रकरणे समाविष्ट होतात. याशिवाय वैवाहिक वाद, महसूल प्रकरणे आणि संक्षिप्त गुन्ह्यांत गुन्हा कबूल केल्यास कमीत कमी दंड आकारून प्रकरणांचा निपटारा केला जातो.
लोकअदालतीत प्रकरण मिटल्यास फायद्याचे काय?
1. लोकअदालतीत प्रकरण मिटल्यावर पुढील अपील होत नाही.
2. न्यायालयीन शुल्क भरावे लागत नाही.
3. जलद निर्णयाद्वारे वेळ आणि पैसा दोन्ही वाचतो.
4. नागरिकांमध्ये सलोखा निर्माण होतो.
न्यायाधीश डॉ. विक्रम अं. आव्हाड यांनी जास्तीत जास्त नागरिकांनी या राष्ट्रीय लोकअदालतीत सहभागी होऊन या सुवर्णसंधीचा लाभ घ्यावा असे आवाहन केले आहे. प्रकरणे जलदगतीने सोडवून वेळ आणि पैसा वाचवण्यासाठी नागरिकांनी या संधीचा लाभ घेण्याचा आग्रह त्यांनी केला.
या लोकअदालतीशी संबंधित अधिक माहितीसाठी जिल्हा विधी सेवा प्राधिकरण गोदिया किंवा तालुका विधी सेवा समिती, सडक अर्जुनी येथे संपर्क साधावा.
“तुमचा वेळ वाचवा, समाधान मिळवा! 14 डिसेंबर 2024 रोजी राष्ट्रीय लोकअदालतीला उपस्थित राहा.”
