आमगाव : राष्ट्रीय ग्राहक हक्क दिनानिमित्त दि.२४ डिसेंबर २०२४ रोजी तहसील कार्यालय, आमगाव येथे विशेष कार्यक्रमाचे आयोजन करण्यात आले. या कार्यक्रमात तहसीलदार मोनिका कांबळे यांनी ग्राहकांनी आपल्या हक्कांची जाणीव ठेवावी आणि गरज पडल्यास तक्रार निवारण यंत्रणांचा वापर करून न्याय मिळवावा, असे आवाहन केले. कार्यक्रमाचे आयोजन तहसील कार्यालय आमगांव आणि अखिल भारतीय ग्राहक पंचायत शाखा, आमगाव यांच्या संयुक्त विद्यमाने करण्यात आले होते.
कार्यक्रमाचे अध्यक्षस्थान तहसीलदार मोनिका कांबळे यांनी भूषवले.प्रमुख पाहुणे म्हणून अध्यक्ष अखिल भारतीय ग्राहक पंचायत शाखा, आमगाव प्राचार्य व्ही. डी. मेश्राम उपस्थित होते.
याशिवाय प्रमुख उपस्थितांमध्ये प्रा. अनिल जोशी, से.नि.मुख्याध्यापक बी.एम.कटरे, आणि अन्नपुरवठा निरीक्षक धपाडे मॅडम यांचा समावेश होता.
कार्यक्रमाची सुरुवात धपाडे मॅडम यांच्या प्रस्ताविकेने झाली. त्यांनी ग्राहक हक्क दिनाचे महत्त्व विशद करून ग्राहकांचे मूलभूत अधिकार समजावून सांगितले.
प्रा. अनिल जोशी यांनी ग्राहक जागरूकता आणि हक्कां विषयी माहिती दिली. ग्राहकांना दर्जेदार वस्तू, माहिती, सुरक्षितता आणि तक्रार निवारणाचे हक्क आहेत. ग्राहक तक्रारींसाठी जिल्हा, राज्य आणि राष्ट्रीय स्तरावर न्यायालये उपलब्ध आहेत. सरकारने ‘जागो ग्राहक जागो’ मोहिमेद्वारे ग्राहक हक्कांविषयी जनजागृती केली आहे. ग्राहकांनी खरेदी करताना सावधगिरी बाळगावी, बिल व हमीपत्रे ठेवावीत आणि फसवणुकीविरुद्ध आवाज उठवावा. जागरूक ग्राहकच सुरक्षित आणि सक्षम समाज घडवतो,असे आपल्या संबोधनात सांगितले.
यानंतर प्राचार्य व्ही. डी. मेश्राम यांनी ग्राहक संरक्षण कायदा 2019 याविषयी सखोल मार्गदर्शन केले. त्यांनी ग्राहक संरक्षण कायद्यांतर्गत नव्या तरतुदी, ग्राहक तक्रार निवारण मंच, आणि केंद्र सरकारच्या उपयोजनांची सविस्तर माहिती दिली.
से.नि. मुख्याध्यापक बी. एम. कटरे यांनी ग्राहकांच्या समस्या, तक्रारी, आणि न्याय मिळवण्याच्या प्रक्रियेबद्दल माहिती दिली. त्यांनी ग्राहकांनी सतर्क राहून आपले हक्क आणि जबाबदाऱ्या यांचा योग्य वापर करावा, असे सांगितले.
कार्यक्रमादरम्यान उपस्थित ग्राहकांना ग्राहक प्रतिज्ञा घेण्याचा कार्यक्रम राबवण्यात आला. प्रा.खंडाईत सर यांनी प्रतिज्ञा दिली.प्रतिज्ञेमध्ये ग्राहकांनी सतर्क राहण्याचे, फसवणूक टाळण्याचे, आणि आवश्यकतेनुसार कायद्याचा आधार घेण्याचे वचन दिले.
तहसीलदार मोनिका कांबळे यांचे प्रेरणादायी मार्गदर्शन : कार्यक्रमाच्या अध्यक्षस्थानी असलेल्या तहसीलदार मोनिका कांबळे यांनी ग्राहकांना त्यांच्या हक्कांची जाणीव करून दिली. त्यांनी ग्राहक संरक्षण कायद्यांतर्गत तक्रार निवारण प्रणालींचा उपयोग करण्याचे आवाहन केले.तहसीलदार कांबळे म्हणाल्या,
“ग्राहक हा बाजारपेठेचा केंद्रबिंदू आहे. त्यामुळे ग्राहकांनी आपल्या हक्कांची सतत जाणीव ठेवली पाहिजे. फसवणूक झाल्यास तत्काळ तक्रार नोंदवावी आणि न्याय मिळवण्यासाठी कायद्याचा आधार घ्यावा.”त्यांनी ग्राहकांना ऑनलाइन खरेदी, गुणवत्तेची तपासणी, आणि वास्तविक बिलाची मागणी यासारख्या मुद्द्यांवर सजग राहण्याचा सल्ला दिला.
कार्यक्रमाचे उत्कृष्ट सूत्रसंचालन आणि आभार प्रदर्शन राहुल बन्सोड यांनी केले. त्यांनी कार्यक्रमाचे संक्षिप्त सार मांडत उपस्थितांचे आणि आयोजकांचे आभार मानले.कार्यक्रमाला नरेंद्र बहटवार, रमेश लिल्हारे, प्रदीप बिसेन यांच्यासह आमगाव तालुका राशन दुकान संघाचे सर्व पदाधिकारी व सदस्य उपस्थित होते.
नागरिकांनी कार्यक्रमाला भरघोस प्रतिसाद दिला. ग्राहक संरक्षणाच्या महत्त्वपूर्ण मुद्द्यांवर चर्चा करून कार्यक्रमाने नागरिकांमध्ये जागरूकता निर्माण केली.
राष्ट्रीय ग्राहक हक्क दिनाच्या निमित्ताने झालेल्या या कार्यक्रमातून ग्राहक हक्क आणि जबाबदाऱ्यांबाबत जागरूकता निर्माण झाली. उपस्थित मान्यवरांच्या मार्गदर्शनामुळे ग्राहकांमध्ये आत्मविश्वास आणि कायदेशीर जागरूकता निर्माण झाली.
ग्राहक संरक्षण कायद्याचे पालन, समस्यांवरील उपाय, आणि हक्कांची जाणीव यावर भर देणारा हा कार्यक्रम यशस्वी ठरला. भविष्यात अशाच उपक्रमांद्वारे ग्राहक जागरूकतेला अधिक बळकटी देण्याचे आवाहन करण्यात आले.
