रावनवाडीतील जी.ई.एस. विद्यालयात वार्षिक स्नेहसंमेलन संपन्न
गोंदिया: गोंदिया शिक्षण संस्था संचालित जी.ई.एस. हायस्कूल व कनिष्ठ कला व विज्ञान महाविद्यालय, रावनवाडी येथे तीन दिवसीय वार्षिक स्नेह संमेलनाचे उद्घाटन संस्थेचे सचिव व माजी आमदार राजेंद्र जैन यांच्या हस्ते संपन्न झाले. या कार्यक्रमात सांस्कृतिक कार्यक्रम, बौद्धिक स्पर्धा व गीतगायन यांसारख्या विविध कार्यक्रमांचे आयोजन करण्यात आले.
यावेळी महाविद्यालयाच्या माजी विद्यार्थ्यांचा, जे शासकीय सेवांमध्ये विविध पदांवर कार्यरत आहेत, राजेंद्र जैन यांच्या हस्ते सत्कार करण्यात आला. सत्कारप्रसंगी त्यांनी उपस्थितांना संबोधित करताना कौशल्यपूर्ण व दर्जेदार शिक्षणासह योग्य मार्गदर्शनाचे महत्त्व स्पष्ट केले.
आपल्या भाषणात जैन म्हणाले की, ग्रामीण भागातील विद्यार्थ्यांना स्पर्धेच्या युगात स्वतःला सिद्ध करता यावे यासाठी त्यांना योग्य मार्गदर्शन, सुविधा आणि संस्कार देणे हे शिक्षक व पालकांचे कर्तव्य आहे. विद्यार्थ्यांच्या सुप्त गुणांना व कलांना वाव देण्याचे महत्त्व अधोरेखित करताना, “शाळा आणि महाविद्यालयाच्या प्रगतीसाठी गुणवत्ता व प्रामाणिकता महत्त्वाची आहे”, असे त्यांनी सांगितले.
स्नेह संमेलनाला प्रमुख पाहुणे म्हणून वैशालीताई पंधरे, शीलाताई वासनिक, विनोद पटले, गेंदलाल शरणागत, सुरजलाल हरिणखेडे, गेंदलाल बिसेन, आनंद लांजेवार, अनिल गजभिये, रेखाताई लिल्हारे, कल्पना बिसेन, पन्नालाल हरिणखेडे, शीलाताई हरीणखेडे, रेणुकाताई मानेकर, प्रतिमाताई बिसेन, वाघारेताई, सुनील पटले, रौनक ठाकुर, रजनीताई प्रजापती, पद्माताई कुंजाम, माधुरीताई पटले, विकास गेडाम, तिलक भगत, सी.बी.बिसेन, चित्रिव सर, बी.ए. राऊत, रेखलाल तुरकर, छायाताई पटले, सरिताताई कटरे, आशिष बरईकर, ज्योतीताई हरीणखेडे, रणजीत वासनिक यांची उपस्थिती होती.
या कार्यक्रमाला पालकवर्ग, शिक्षक, शिक्षकेत्तर कर्मचारी, तसेच विद्यार्थी व विद्यार्थिनी मोठ्या संख्येने उपस्थित होते. सांस्कृतिक कार्यक्रम व स्पर्धांमध्ये विद्यार्थ्यांनी उत्साहाने भाग घेतला. कार्यक्रम यशस्वी होण्यासाठी संस्थेच्या सर्व शिक्षकांनी विशेष परिश्रम घेतले.

