मुख्यमंत्री आदेश मरापे यांचे संवेदनशील पाऊल; स्वतः रक्तदान करून रुग्णाचा जीव वाचवला
नागपूर : सामाजिक बांधिलकी आणि संवेदनशील नेतृत्वाचा सर्वोत्तम आदर्श धनवटे नॅशनल कॉलेज करिअर कट्टा चे मुख्यमंत्री आदेश मरापे यांनी घालून दिला आहे. त्यांनी स्वतः रक्तदान करून एका गंभीर रुग्णाचा जीव वाचवला. त्यांच्या या सहृदय कृतीचे सर्वत्र कौतुक होत आहे.
रितेश उईके (वय – २७) हे गंभीर आजारामुळे नागपूर मेडिकल कॉलेजमध्ये दाखल होते. उपचारादरम्यान त्यांना दुर्मिळ रक्तगटाचे रक्त तातडीने आवश्यक होते. मात्र, रक्तपेढ्यांमध्ये हा रक्तसाठा उपलब्ध नव्हता. कुटुंबीयांनी रक्त मिळवण्यासाठी अनेक ठिकाणी प्रयत्न केले, पण कुठेही रक्त मिळाले नाही.
ही माहिती मुख्यमंत्री आदेश मरापे यांच्यापर्यंत पोहोचली. परिस्थितीचे गांभीर्य लक्षात घेऊन त्यांनी स्वतःच चौकशी केली, परंतु रक्तपेढीत आवश्यक रक्त साठा नसल्याचे स्पष्ट झाले. वेळ न दवडता त्यांनी तातडीने स्वतः रक्तदान करण्याचा निर्णय घेतला.
मरापे तातडीने नागपूर मेडिकल कॉलेजमध्ये पोहोचले. डॉक्टरांच्या देखरेखीखाली त्यांनी रक्तदान केले. त्यांच्या या कृतीमुळे रुग्णावर त्वरित उपचार सुरू करता आले आणि त्याची प्रकृती सुधारू लागली. डॉक्टरांनीही सांगितले की, वेळेत रक्त न मिळाले असते तर परिस्थिती गंभीर बनली असती.
रक्तदान हा एक छोटा पण अत्यंत महत्त्वाचा सामाजिक उपक्रम आहे. मुख्यमंत्री आदेश मरापे यांच्या कृतीमुळे अनेक युवक प्रेरित होत असून, रक्तदानासाठी पुढे सरसावत आहेत. त्यांच्या या निर्णयामुळे सामाजिक बांधिलकी आणि संवेदनशील नेतृत्वाचा नवा आदर्श निर्माण झाला आहे.
मुख्यमंत्री आदेश मरापे यांच्या संवेदनशील कृतीमुळे केवळ एका रुग्णाचा जीव वाचला नाही, तर संपूर्ण समाजात रक्तदानाबद्दल जागरूकता वाढली आहे. त्यांच्या या महत्त्वपूर्ण निर्णयाचे सर्व स्तरातून स्वागत होत आहे.
