प्राध्यापकांच्या समस्यांवर सखोल चर्चा; डॉ. गजाधर भगत अध्यक्षपदी निवड
गोंदिया : जिल्ह्यातील वरिष्ठ महाविद्यालयांमध्ये कार्यरत प्राध्यापकांची सभा रविवार, दि. 9 मार्च 2025 रोजी सकाळी 10:00 वाजता संपन्न झाली. या सभेचे अध्यक्षपद डॉ. एस. टी. नंदेश्वर यांनी भूषविले, तर नूटा संघटनेचे सचिव डॉ. नितिन कोंगरे आणि डॉ. विकास टाले हे निवडणुकीचे पर्यवेक्षक म्हणून उपस्थित होते.
प्राध्यापकांच्या समस्या आणि मागण्यांवर सखोल चर्चा:
सभेच्या वेळी प्राध्यापकांच्या विविध समस्यांवर सखोल चर्चा करण्यात आली. चर्चेचे संचालन डॉ. जी. के. भगत यांनी केले. यामध्ये सेवानिवृत्त तसेच सेवेत असलेल्या प्राध्यापकांच्या उपदान रक्कम, जुनी पेन्शन योजना, पीएच.डी. वेतनवाढ, नवीन प्राध्यापकांच्या पदोन्नतीचे प्रश्न तसेच सर्वोच्च न्यायालयात सुरू असलेल्या नेट-सेट प्रकरणाची सद्यस्थिती याबाबत महत्त्वपूर्ण माहिती देण्यात आली.
गोंदिया जिल्हा नूटा संघटनेच्या नवीन कार्यकारिणीची निवड
सभेदरम्यान गोंदिया जिल्हा नूटा संघटनेच्या नवीन कार्यकारिणीची निवड करण्यात आली. नव्याने नियुक्त झालेल्या पदाधिकाऱ्यांची नावे पुढीलप्रमाणे –
अध्यक्ष – डॉ. गजाधर खुशाल भगत
उपाध्यक्ष – डॉ. द्वारपाल चौधरी
सचिव – डॉ. प्रदीप भानसे
सहसचिव – डॉ. शामकूवर
कार्यकारी सदस्य – डॉ. विजय राणे, डॉ. भगवानदास सूर्यवंशी, डॉ. शमसाद शेख
नवनियुक्त पदाधिकाऱ्यांनी आपल्या जबाबदारीची जाणीव ठेवून संघटनेच्या सर्व मागण्यांसाठी कार्यरत राहण्याचा निर्धार व्यक्त केला.
नवीन कार्यकारिणीचे अभिनंदन आणि शुभेच्छा:
सभेस उपस्थित प्राध्यापकांनी नव्याने निवड झालेल्या कार्यकारिणीचे हार्दिक अभिनंदन केले आणि त्यांच्या भावी कार्यकाळासाठी शुभेच्छा दिल्या. यावेळी नवनियुक्त कार्यकारिणीने सर्व सदस्यांचे आभार मानले आणि संघटनेच्या भविष्यातील कार्यपद्धतीबाबत आश्वासन दिले.
सभेसाठी महाविद्यालयाची इमारत उपलब्ध करून दिल्याबद्दल प्राचार्य भुवन एम. बिसेन यांचे आभार मानण्यात आले. तसेच, उपस्थित सदस्यांनी सभेच्या यशस्वी आयोजनाबद्दल समाधान व्यक्त केले. नूटा संघटनेच्या पुढील वाटचालीस शुभेच्छा देत सभेची सांगता करण्यात आली.
