गोंदिया : “खुशीयारा वनबंधु फाउंडेशन” ही नव्याने स्थापन झालेली सेक्शन ८ अंतर्गत नोंदणीकृत स्वयंसेवी संस्था आदिवासी, वनवासी व ग्रामीण भागातील समाजाच्या सशक्तीकरणासाठी कार्य करणार आहे. संस्था महाराष्ट्रातील गोंदिया, चंद्रपूर, अकोला, अमरावती, नागपूर, भंडारा तसेच छत्तीसगड व मध्यप्रदेशातील निवडक भागांमध्ये कार्यरत राहणार आहे.
संस्थेचा मुख्य उद्देश म्हणजे ग्रामीण व आदिवासी समाजातील युवक-युवतींना व्यावसायिक व जीवनोपयोगी कौशल्यांचे प्रशिक्षण देणे, त्यांना आत्मनिर्भर बनवणे व स्थानिक पातळीवर रोजगाराच्या संधी उपलब्ध करून देणे. तसेच, वन्यजीव संरक्षण व मानव-वन्यजीव संघर्ष यासारख्या महत्त्वाच्या विषयांवर संस्थेच्या वतीने विशेष जनजागृती मोहीम राबवली जाणार आहे. वनालगतच्या वस्त्यांमध्ये राहणाऱ्या लोकांमध्ये वन्य प्राण्यांबद्दल संवेदनशीलता वाढवणे, सहअस्तित्वाचे मूल्य शिकवणे व संघर्ष कमी करण्यासाठी उपाययोजना सुचवणे हे संस्थेचे प्राथमिक उद्दिष्ट राहणार आहे.
यामध्ये राबविण्यात येणारे उपक्रम:
1. कौशल्य विकास कार्यशाळा
2. पर्यावरण व वन्यजीव संवर्धन विषयक जनजागृती शिबिरे
3. मानव-वन्यजीव संघर्ष प्रतिबंधासाठी मार्गदर्शक सत्र
4. महिलांसाठी विशेष उपजीविका प्रशिक्षण उपक्रम
5. शालेय व महाविद्यालयीन विद्यार्थ्यांसाठी मार्गदर्शन शिबिरे
संस्थापकांचे प्रतिपादन:
“वनवासी समाजात परिवर्तन घडवायचे असेल, तर त्यांच्या परंपरागत ज्ञानाला आधुनिक कौशल्यांची जोड देणे अत्यावश्यक आहे. याचबरोबर मानव व वन्यजीव यांच्यात संतुलन राखणे ही आपल्या काळाची गरज आहे,” असे संस्थापकांनी सांगितले.
उदघाटन समारंभास उपस्थित मान्यवरांचे मार्गदर्शन लाभले:
जिल्हा परिषद सदस्य शशेंद्र भगत, ग्रामपंचायत सरपंच टेकाम, उपसरपंच गदवार, कृषी उत्पन्न बाजार समितीचे अध्यक्ष संजय भगत, परमपूज्य परमात्मा एक संस्थेचे कार्यकर्ते लालाजी फरदे, सामाजिक कार्यकर्ते धनंजय चौधरी, संजय घासले, तसेच वनविभागाचे अधिकारी व कर्मचारी यांची उपस्थिती लाभली.
