Cure India Foundation, DEIC, RBSK व Indian Dental Association, Gondia यांच्या संयुक्त विद्यमानाने रुग्णालयात विशेष कार्यक्रमाचे आयोजन; क्लबफूटवरील जनजागृतीसह लाभार्थ्यांना मार्गदर्शन व खेळणी वाटप
गोंदिया : जिल्हा सामान्य रुग्णालय (के.टी.एस) व बाई गंगाबाई रुग्णालय, गोंदिया येथील डि.ई.आय.सी (District Early Intervention Center) येथे जागतिक क्लबफूट दिन अत्यंत उत्साहात साजरा करण्यात आला. राष्ट्रीय बाल स्वास्थ्य कार्यक्रम (RBSK), Cure India Foundation आणि Indian Dental Association (IDA), Gondia यांच्या संयुक्त विद्यमानाने व सिव्हिल सर्जन डॉ. प्रशांत तुरकर, अतिरिक्त जिल्हा शल्यचिकित्सक डॉ. तृप्ती कटरे भगत, डॉ. प्रियंका शेंडे (IDA सचिव), अस्थिरोगतज्ञ डॉ. नंदकिशोर हरणे, आणि डॉ. राहुल बागडे यांच्या मार्गदर्शनाखाली हा कार्यक्रम संपन्न झाला.
कार्यक्रमात क्लबफूट असलेल्या बालकांचे पालक आपल्या अनुभव कथनाद्वारे इतरांना मार्गदर्शन करत होते. त्यांनी कास्टिंग, शस्त्रक्रिया व उपचारप्रक्रिया याबाबत सखोल माहिती देऊन आपल्या प्रवासाची प्रेरणादायी मांडणी केली.
CURE इंडिया फाउंडेशनच्या को-ऑर्डिनेटर सौ. सायली अदमाने यांनी क्लबफूट वरील उपचारपद्धती, संस्थेचे कार्य व समाजात पोहचवले जाणारे लाभ याबाबत माहिती दिली.
उपस्थित सर्व मान्यवरांनी क्लबफूट रुग्णांच्या उपचार प्रक्रियेत आपला सक्रिय सहभाग नोंदवत कार्याचा गौरव केला. यावेळी उपस्थित पालक व मान्यवरांना DEIC केंद्राच्या IEC माहितीपत्रकांचे वितरण करण्यात आले. याशिवाय, क्लबफूटवर यशस्वी उपचार घेतलेल्या आणि बरे झालेल्या बालकांना Indian Dental Association, Gondia तर्फे प्रेरणादायी भेटवस्तू (खेळणी) देऊन सन्मानित करण्यात आले. उपचारप्रक्रिया सुरू असलेल्या लाभार्थ्यांनाही पुढील संदर्भ सेवा व योग्य मार्गदर्शन करण्यात आले.
कार्यक्रमाच्या यशस्वी आयोजनासाठी DEIC, RBSK, Cure India Foundation व Indian Dental Association, Gondia यांच्या कार्यसंघांनी समन्वय साधून मोलाचे योगदान दिले.
समाजात क्लबफूटसंदर्भात जनजागृती निर्माण करणे, वेळेवर निदान आणि योग्य उपचार देणे यावर या कार्यक्रमाचा भर होता.
उल्लेखनीय मुद्दे :
क्लबफूट हा जन्मजात दोष असून वेळेवर उपचारांद्वारे पूर्णपणे बरा होतो.
DEIC केंद्रामार्फत अशा बालकांना मोफत तपासणी, उपचार व फॉलोअप सेवा दिल्या जातात.
पालकांचे प्रत्यक्ष अनुभव हे इतर पालकांसाठी आधार व प्रेरणा ठरतात.
उपस्थित डॉक्टरांचे विचार :
“क्लबफूटवरील उपचाराची प्रक्रिया शास्त्रशुद्ध असून वेळेवर निदान झाल्यास उत्तम परिणाम मिळतो.”
— डॉ. नंदकिशोर हरणे, अस्थिरोगतज्ञ
“DEIC केंद्रामार्फत बालकांना आवश्यक सेवा पुरवण्याचा आमचा प्रयत्न आहे. पालकांनी पुढे येऊन या सेवेचा लाभ घ्यावा.”
— डॉ. तृप्ती कटरे भगत, अतिरिक्त जिल्हा शल्यचिकित्सक
अशा उपक्रमांद्वारे केवळ जनजागृती नव्हे तर समाजात सकारात्मक दृष्टिकोन निर्माण होतो. बालकांचे आरोग्य हे आपल्या समाजाचे भविष्य आहे, आणि त्या दिशेने DEIC व इतर संस्थांचा हा प्रयत्न निश्चितच उल्लेखनीय आहे.
