भंडारा, दि. ३० : भंडारा जिल्ह्याचे पालकमंत्री तथा राज्याचे राज्यमंत्री (गृह-ग्रामीण, गृहनिर्माण, शालेय शिक्षण, सहकार व खनिकर्म) डॉ. पंकज भोयर यांनी जिल्ह्यातील जनता दरबारात प्राप्त झालेली जिल्हास्तरीय प्रकरणे २० ऑक्टोबर २०२५ पर्यंत जलद गतीने निकाली काढण्याचे स्पष्ट आणि कठोर निर्देश आज दिले. नागरिकांना तातडीने दिलासा देणे ही प्रशासनाची प्राथमिक जबाबदारी आहे, असे प्रतिपादन त्यांनी केले.
ऑनलाईन बैठकीतून जिल्हा प्रशासनाचे कान टोचले
पालकमंत्री डॉ. भोयर यांनी नागपूर येथील म्हाडा कार्यालयातून ऑनलाईन पद्धतीने आढावा बैठक घेतली. तर, भंडारा जिल्हाधिकारी कार्यालयाच्या सभागृहातून जिल्हाधिकारी सावन कुमार, जिल्हा पोलीस अधीक्षक नुरूल हसून, अपर जिल्हाधिकारी राजेंद्रकुमार जाधव, निवासी उपजिल्हाधिकारी लीना फलके यांच्यासह सर्व विभागप्रमुख उपस्थित होते.
जनता दरबारातील तक्रारी तातडीने निकाली काढून नागरिकांना दिलासा देणे ही प्रशासनाची प्राथमिक जबाबदारी आहे. जिल्हा स्तरावरील प्रलंबित प्रकरणांचा निपटारा निश्चित कालमर्यादेत करावा आणि लोकांना दिलेल्या आश्वासनांची पूर्तता वेळेत व्हावी यासाठी सर्व विभागप्रमुखांनी जबाबदारीने काम करावे, असे निर्देश डॉ. भोयर यांनी यावेळी दिले.
प्रलंबित प्रकरणांची तालुका निहाय आकडेवारी
जनता दरबारातून जिल्ह्यात एकूण ५२२ प्रकरणे प्राप्त झाली असून त्यापैकी १९५ प्रकरणांचा निपटारा करण्यात आला आहे. मात्र, अद्यापही ३३९ प्रकरणे प्रलंबित आहेत.
| तालुका | एकूण प्राप्त प्रकरणे | निकाली काढलेली प्रकरणे | प्रलंबित प्रकरणे |
|—|—|—|—|
| तुमसर | ६० | ३५ | ३७ |
| लाखनी | ५१ | १२ | ३९ |
| साकोली | ५० | २० | ३० |
| मोहाडी | ६५ | २१ | ४४ |
| पवनी | ८३ | ४७ | ३६ |
| भंडारा | १५१ | ३९ | ११२ |
| लाखांदुर | ६२ | २१ | ४१ |
| एकूण | ५२२ | १९५ | ३३९ |
भंडारा तालुक्यात सर्वाधिक ११२ प्रकरणे प्रलंबित आहेत. न्यायप्रविष्ट प्रकरणांबाबत संपूर्ण अद्ययावत माहिती घेऊन ती पालकमंत्री कार्यालयास सादर करण्याचे निर्देशही डॉ. भोयर यांनी दिले आहेत.
जिल्ह्यातील महत्त्वाच्या विषयांवर चर्चा
बैठकीत जिल्ह्याच्या महत्त्वाच्या मुद्द्यांवर चर्चा करण्यात आली.
* अपघाती मृत्यू: मागील नऊ महिन्यांत १३० जणांचा अपघाती मृत्यू झाल्याची गंभीर बाब मांडली गेली. यासंबंधीची संपूर्ण माहिती प्रशासनाने सादर करावी, असे निर्देश देण्यात आले.
* पूरग्रस्तांचे पंचनामे: जिल्हाधिकारी सावन कुमार यांनी पूरग्रस्त भागातील शेतकऱ्यांच्या नुकसानीचे पंचनामे तातडीने करून शासनाकडे प्रस्ताव पाठविण्याचे आदेश संबंधित विभागांना दिले.
* विकास कामे: वैद्यकीय महाविद्यालयाच्या कामाला प्राधान्य देऊन गती देण्याची सूचना करण्यात आली. तसेच, पाणंद रस्त्यांच्या दुरुस्तीची कामे सेवा पंधरवाड्यात शासन निर्णयानुसार प्रगतीपथावर असल्याची माहिती जिल्हाधिकाऱ्यांनी दिली.
* शासकीय प्रलंबन: शासन स्तरावर प्रलंबित असलेल्या विषयांची संपूर्ण संदर्भीय माहिती आणि त्यावर केलेल्या कार्यवाहीचा अहवाल पालकमंत्री कार्यालयास देण्याचे निर्देशही यावेळी डॉ. भोयर यांनी दिले.
