अहेरी – अहेरी तालुक्यातील साकीनगट्टा येथील अंगणवाडी केंद्रात गरोदर माता आणि बालकांना पुरवण्यात येणारा पोषण आहार अत्यंत निकृष्ट दर्जाचा असल्याचा धक्कादायक प्रकार उघडकीस आला आहे. हा आहार ‘किक व बुरशी’युक्त असून, काही पॅकेट्समध्ये तर चक्क ‘अळ्या’ पडल्याचे निष्पन्न झाले आहे.
माजी जिल्हा परिषद अध्यक्षा भाग्यश्री ताई आत्राम यांनी घेतला गंभीर दखल:
या गंभीर प्रकाराची माहिती साकीनगट्टा येथील नागरिकांनी आणि वारलू दादा यांनी थेट माजी जिल्हा परिषद अध्यक्षा मा.सौ. भाग्यश्री ताई आत्राम यांना दूरध्वनीद्वारे दिली.
तक्रार मिळताच, तात्काळ राष्ट्रवादी काँग्रेस पक्ष (शरदचंद्र पवार) अहेरीचे माजी अध्यक्षा यांनी तातडीने गावात जाऊन पाहणी करण्याचे निर्देश दिले. त्यांनी साकीनगट्टा येथे धाव घेऊन गावकरी बांधवांशी चर्चा केली आणि निकृष्ट आहाराचा पंचनामा केला. यावेळी त्यांनी थेट ताईसाहेबांशी फोनवरून संपर्क साधून गावकरी आणि नागरिकांचे त्यांच्याशी बोलणे करून दिले.
किड, बुरशी, अळ्या आणि मुदतबाह्य आहार:
पाहणीदरम्यान अंगणवाडी सेविकेकडून धक्कादायक माहिती समोर आली. जून ते सप्टेंबर या चार महिन्यांसाठी पुरवण्यात आलेले धान्य, डाळ, गहू, तांदूळ या वस्तूंना किड व बुरशी लागल्याचे स्पष्टपणे दिसून आले. विशेषतः, काही पॅकेट्समध्ये ‘अळ्या’ देखील आढळल्या.
गावकऱ्यांच्या विचारणेनुसार, एकात्मिक बालविकास प्रकल्प अधिकारी, अहेरी यांनी सकाळी 10 वाजता गावात येऊन पाहणी केली होती. त्यावेळी चार महिन्यांपूर्वीचा शिल्लक असलेला आहार — वटाणा, तांदूळ, गहू, डाळ, तेल, तिखट, मीठ आणि हळद यांची पॅकेट्स मुदतबाह्य असल्याचे स्पष्ट झाले.
ऑक्टोबर महिन्याचा आहार मात्र दोन दिवसांपूर्वीच आणून दिला गेला असून तो व्यवस्थित असल्याचे यावेळी सांगण्यात आले.
दोषींवर कठोर कारवाई अटळ – भाग्यश्री ताई आत्राम:
या गंभीर प्रकारावर मा. सौ. भाग्यश्री ताई आत्राम यांनी तीव्र संताप व्यक्त करत स्पष्ट शब्दात इशारा दिला आहे.
> “गरोदर महिला आणि बालकांना दिला जाणारा आहार जर निकृष्ट दर्जाचा असेल, तर तो कोणत्याही परिस्थितीत खपवून घेतला जाणार नाही. दोषी पुरवठादार किंवा अधिकारी कोणीही असो, त्यांच्यावर कठोर कारवाई केली जाईल.”
या प्रकरणाची त्या स्वतः मुख्य कार्यकारी अधिकारी (CEO) यांच्याशी संपर्क साधून कठोर कारवाईची मागणी करणार असल्याचे त्यांनी सांगितले.
राष्ट्रवादी काँग्रेस पक्षाकडून स्वतंत्र तपास:
या संपूर्ण प्रकरणाची राष्ट्रवादी काँग्रेस पक्ष (शरदचंद्र पवार) अहेरी स्वतंत्रपणे तपासणी करणार असून, लवकरच मुख्य कार्यकारी अधिकारी यांच्याकडे यासंबंधीचा सविस्तर अहवाल सादर करणार आहे.
पाहणीवेळी अंगणवाडी सेविका, साकीनगट्टा येथील नागरिक आणि पक्षाचे पदाधिकारी मोठ्या संख्येने उपस्थित होते.
