पत्नीच्या चारित्र्यावर संशय घेऊन कुरहाडीने जीवघेणा हल्ला: गोंदिया सत्र न्यायालयाचा ऐतिहासिक निर्णय
गोंदिया, (दि. १७ ऑक्टोबर): दारुच्या व्यसनात बुडालेल्या आणि पत्नीच्या चारित्र्यावर नेहमी संशय घेणाऱ्या एका क्रूर पतीला आज गोंदिया येथील अतिरिक्त सत्र न्यायालयाने कठोर शासन केले आहे. अतिरिक्त सत्र न्यायालय-१, गोंदिया यांनी पत्नीची हत्या करण्याचा प्रयत्न करणाऱ्या आरोपी पवन सुरज खांडेकर (वय ४२ वर्ष, रा. गोरेगाव, जि. गोंदिया) यास १० वर्षांचा सश्रम कारावास आणि २,०००/- रुपये दंडाची शिक्षा ठोठावली.
हा हृदयद्रावक प्रकार गोरेगाव येथे घडला. मिळालेल्या माहितीनुसार, आरोपी पवन खांडेकर हा दारु पिण्याच्या सवयीचा होता आणि तो आपली पत्नी सोनाली खांडेकर हिच्या चारित्र्यावर सातत्याने संशय घेऊन तिच्यासोबत भांडणे करत असे. याच वादामुळे गेली पाच ते सहा वर्षे हे पती-पत्नी वेगवेगळ्या खोलीत राहत होते. घटनेच्या वेळी आरोपीच्या वडिलांची प्रकृती बरी नसल्याने तो पत्नीसोबत एकाच ठिकाणी राहण्यास आला होता.
दिनांक १७/०३/२०२२ रोजी सकाळी १०.०० ते रात्री ०८.३० पर्यंत आरोपीने पत्नीशी याच संशयावरून वाद घातला. रात्री जेवण करून सगळे झोपल्यानंतर, अंदाजे ०१.०० वाजताच्या दरम्यान, आरोपीने क्रौर्याची परिसीमा गाठली. पत्नी गाढ झोपेत असताना, तिचा जीव घेण्याच्या निर्घृण हेतूने त्याने तिच्या कपाळावर कुरहाडीने वार केला, ज्यामुळे ती गंभीर जखमी झाली.
मुलीची समयसूचकता, आईला मिळाले जीवनदान:रक्ताच्या थारोळ्यात पडलेल्या जखमी सोनाली खांडेकर यांना त्यांच्या कन्येने, कु. ईशा पवन खांडेकर हिने, तात्काळ गोरेगाव येथील ग्रामीण रुग्णालयात दाखल केले. कपाळावर गंभीर मार लागल्याने त्यांना पुढील उपचारांसाठी के.टी.एस. रूग्णालय, गोंदिया येथे हलविण्यात आले. सुदैवाने, गंभीर जखम होऊनही योग्य उपचारांमुळे त्या थोडक्यात बचावल्या.
आईला वाचवणाऱ्या कु. ईशा खांडेकर हिनेच दुसऱ्याच दिवशी, दिनांक १८/०३/२०२२ रोजी, आपल्या वडिलांविरुद्ध पोलीस स्टेशन गोरेगाव येथे तक्रार दाखल केली.
फिर्यादीच्या तक्रारीवरून पोलीस स्टेशन गोरेगाव येथे आरोपीविरुद्ध सुरुवातीला कलम ३२६ भादवि प्रमाणे गुन्हा नोंदविण्यात आला होता. तत्कालीन तपासी अधिकारी, सहायक पोलीस निरिक्षक संदीप गोसावी, गोरेगाव यांनी प्रकरणाचा सखोल तपास करून आरोपीविरुद्ध जिल्हा व सत्र न्यायालय, गोंदिया येथे दोषारोपपत्र सादर केले.
या महत्त्वपूर्ण खटल्यात आरोपीविरुद्ध दोष सिद्ध करण्यासाठी सरकार/पिडीत पक्षातर्फे जिल्हा सरकारी वकील महेश एस. चंदवानी आणि सहा. सरकारी वकील कृष्णा डी. पारधी यांनी अथक परिश्रम घेतले. त्यांनी एकूण १० साक्षदारांची साक्ष तसेच वैद्यकीय आणि इतर आवश्यक कागदोपत्री दस्तऐवज न्यायालयासमोर सादर करून गुन्ह्याची गंभीरता सिद्ध केली.
आरोपीचे वकील आणि सरकारी वकील महेश एस. चंदवानी यांच्या सविस्तर युक्तिवादानंतर, मा. ए.एस. प्रतिनिधी, जिल्हा व अतिरिक्त सत्र न्यायाधीश क्र. १, गोंदिया यांनी सरकारी पक्षाने सादर केलेला पुरावा पूर्णपणे ग्राह्य धरला.
न्यायालयाने आरोपी पवन सुरज खांडेकर (वय ४२ वर्षे) यास भारतीय दंड विधान चे कलम ३०७ (खुनाचा प्रयत्न) अंतर्गत दोषी ठरवून १० वर्षांचा सश्रम कारावास आणि २,०००/- रुपये दंडाची शिक्षा ठोठावली. दंड न भरल्यास, आरोपीस २ महिन्यांचा अतिरिक्त कारावास भोगावा लागणार आहे.
सदर प्रकरणात पोलीस अधिक्षक गोरख भामरे यांच्या मार्गदर्शनाखाली पैरवी कर्मचारी प्रकाश शिरसे (सहा. फौजदार) यांनी उत्तम कामगिरी बजावली.
