गडचिरोली: सिरोंचा तालुक्यातील अवैध वाळू उत्खनन आणि वाहतूक प्रकरणात महसूल विभागाच्या तीन अधिकाऱ्यांवर (तलाठी, मंडळाधिकारी आणि तहसीलदार) निलंबनाची कारवाई झाली असली तरी, या संपूर्ण प्रकरणाला ‘नियमानुसार’ असल्याची क्लीन चिट देणारे जिल्हा खनिकर्म अधिकारी (DMO) डॉ. इम्रान शेख यांच्यावर अद्याप कोणतीही कारवाई झाली नसल्याने सामाजिक कार्यकर्ते संतोष ताटीकोंडावार यांनी तीव्र संताप व्यक्त केला आहे.
माफियांना पाठराखण: गंभीर आरोप
अवैध वाळू माफियांच्या विरोधात आवाज उचलणाऱ्यांमध्ये संतोष ताटीकोंडावार यांचे नाव अग्रस्थानी आहे. त्यांनी या प्रकरणावरून थेट डॉ. शेख यांच्या भूमिकेवर प्रश्नचिन्ह उभे केले आहे.
> ताटीकोंडावार यांच्या म्हणण्यानुसार, “गौण खनिज उत्खननावर नियंत्रण ठेवण्याची मुख्य आणि सर्वात महत्त्वाची जबाबदारी जिल्हा खनिकर्म अधिकाऱ्यांची असताना, डॉ. शेख यांनी चौकशी पूर्ण होण्यापूर्वीच, सिरोंचा येथील वाळू साठा व विक्री नियमानुसारच होत असल्याचा दावा करत माफियांना उघडपणे ‘क्लीन चिट’ दिली. हा एक गंभीर प्रकार आहे. महसूल विभागाचे तीन अधिकारी निलंबित झाले, कारण तब्बल १५ हजार ६५५ ब्रास अवैध वाळू साठा आढळला आणि माफियांवर २९ कोटींचा दंड प्रस्तावित आहे. असे असताना, ज्या अधिकाऱ्याने नियमांचे उल्लंघन करणाऱ्यांना पाठबळ दिले, त्यांना कोण वाचवत आहे?”
>
ताटीकोंडावार यांनी यापूर्वीही, अवैध वाळू वाहतूक प्रकरणात दोषींवर कारवाई व्हावी अन्यथा आंदोलन करण्याचा इशारा दिला होता. त्यांच्यासह अन्य सामाजिक कार्यकर्त्यांच्या दबावामुळेच प्रशासनाला ही कारवाई करावी लागली. मात्र, आता त्यांचा रोख डॉ. शेख यांच्यावर आहे, कारण त्यांच्या ‘तत्परते’मुळे आणि ‘क्लीन चिट’मुळे गंभीर शंका उपस्थित झाल्या आहेत.
ताटीकोंडावार यांचा थेट सवाल:
या प्रकरणात, तलाठी, मंडळाधिकारी आणि तहसीलदार या तिघांना निलंबनाला सामोरे जावे लागले. मग, माफियांची पाठराखण करणाऱ्या जिल्हा खनिकर्म अधिकारी डॉ. इम्रान शेख यांच्यावर कारवाई का नाही? यातून कोणाला वाचवण्याचा प्रयत्न होत आहे, असा संतप्त सवाल सामाजिक कार्यकर्ते संतोष ताटीकोंडावार यांनी केला आहे.
